Die 5. Scena.

Cenodoxophylax deß Doctors SchutzEngel.

Conscientia das Gwissen.

Der SchutzEngel sorgt vmb Cenodoxum: schickt jhm das Gwissen zu Hauß / sträwet etliche Zettele nider / darauff schöne Sprüch auß heiliger Schrifft wider die Hoffart.

Cen^ax. Mein Pflegekind schwebt in grosser gfahr /

Darumb komb ich bey zeiten dar /

765Das ich wo müglich jhn erhalt /

Jhm beystehe wider Höllen gwalt /

Deß Lucifers vnd Sathans hauff

Ihr List vnd Anschläg haben drauf /

Wie sie jhn möglichister massen

770In jhre Klatten mögen fassen.

[29]Damit sie jhn hinunter stürtzen /

Vnd an der Seeligkeit verkürtzen.

O wie bemühet sich so sehr

Das höllisch Gsind je mehr vnd mehr!

775Der Feind der wachet Tag vnd Nacht /

Dem Menschen sein verderben tracht /

Doch schläfft der Mensch ohn sorg hinan /

Als geh jhn alles nicht nit an /

[37]O wie gar offt müst er verderben /

780Vnd ohne mittel / ellend sterben /

Wann wir nit stets beschützten jhn /

Daß er nit fall in Vnglück hin /

Durch Fewr / durch Schwert / durch List / durch Gifft /

Vnd das er sonst nit vnrath stifft:

785Gibt sich all Tag in gfahr hinauß /

Vnd waiß doch nit wer jhm hilfft drauß:

Zu seiner Zeit wird er es doch

Mit laid auch jnnen werden noch.

Jetzt geh ich / will nach meinem brauch

790Dem Cenodoxo helffen auch /

Komb her / du Gwissen / da herein /

Laß dir diß Hauß befolchen seyn.

Consc. Was soll ich dann darinnen machen?

Cen^ax. Auff Cenodoxum soltu wachen /

795Vnd jhn antreiben aller massen /

Jhm Tag vnd Nacht kein Ruhe mehr lassen.

Das Förchten soll er lehrnen vil /

Weil jhm die Lieb nit eingehn will.

Consc. Ja wol / das ist vorhin mein brauch /

800Kein fleiß will ich da sparen auch.

[30]Cen^ax. Tring dapfer drauff vnd heng dich ein /

Biß er absteht von Sünden sein.

Das Gwissen geht hinweck / der SchutzEngl redt weiter allainig.

Nun diser Wurm der soll jhn plagen

Sein Hertz ohn vnterlaß zernagen.

805Dergleichen Gwissenangst vnd Pein /

Jagn wir zuweiln den Menschen ein;

Sie wissens aber / laider / gschwind

Vnd leicht zuschlagen in den Wind:

Jedoch thun wir das vnserig.

810Ach was ist diß das ich da sich!

Wohin ich mit den Augen blick /

Sih ich herumber lauter Strick /

Wer nit vil hundert Augen hat /

Der sihet dise gfahr zu spat:

815Ich waiß es wol / es fählt mir nicht /

Sie seynd auff Cenodoxum gricht /

Darein er sich verwicklen soll

O säch ers auch wie jch / so wol!

O grosse gfahr! Der Mensch sichts nit /

820Wir Engel sehens / doch damit

Ich meines thails nichts vnterlaß /

Vnd auch mein Hilff thue guter maß /

So will ich vnter disen Stricken /

Etlich gut Saamen lassen blicken /

825Die er soll sehen vnd finden wol /

Vnd ohn gfehr gschehen / mainen soll /

[31]Was ich mit sonderm fleiß gethan:

In Gottes Nam wirff ichs hinan.

Ach wachset auff in guter Erd /

830Damit ein reicher schnitt drauß werd.

[39]Die 6. Scena.

Panurgus der HauptTeufel.

Hypocrisis die Gleißnerey.

Philautia die Aigne Lieb.

Der Teufel verwundert sich / daß er diser zeit ein solchen Schnitt von verdambten Seelen hat; rüefft die Gleißnerey vnd aigne Lieb zu sich / weil jhn verlangt zu wissen / wie es mit dem Doctor ein fortgang habe: Werden vnains / weil das Gwissen vnuermerckt zum Doctor hinein geschlichen.

Pan. Hui wie reißt auff der Höllengrund

So schröcklich seinen Drackenschlund!

Der je gantz vnersättlich ist /

Wie mehr er hat je mehr er frist.

835Es suechen / tragen all mein Gsellen /

Sie ziehen / reissen hin zur Höllen

Alls allenthalben vmb vnd vmb /

Deß Raubs ist ein sehr grosse Summ /

Von Menschen / die ohn vnterlaß

840Hinunter fallen wie das Graß /

Als wann der Wind daß Hew vmbweilt /

Wie Regen auß der Wolcken eilt /

Das ich hoch in verwundern stehe /

Wie noch ein Mensch auff Erd vmbgehe /

[32]Wann ich herauff von meiner stöll

846Komb widerumben auß der Höll /

Kan ich mich gnueg verwundern nit /

Das vbrig noch so grosser schnidt

In d’Höll zuführn / als wann bißher

850Noch nie kein Schnitt gewesen wer.

Ist doch jetzt gar vonnöthen nit /

[40]Daß ich mich vil bemühe darmit /

Von jhnen selbst der maiste thail

Verschlauderen jhr ewigs hail.

855Dahero deren wenig seynd /

Die etwas widerstehn dem Feind /

Mir dennoch leichtlich fallen bey /

Durch aigne Lieb vnd Gleißnerey.

Mir ist gar seltzam waiß nit wie:

860Ja gwißlich ist gewesen hie

Ein Engel / mein geschworner Feind /

Der hat diß Hauß new eingezeint.

Der Paß nit offen ist so gar /

Wie er zuuor gewesen war /

865Es treibt mich widerumb zuruck

Ein frembde Krafft / ein haimblichs stuck!

Ey ey: Das hab längst gforchten ich /

Er wird vmb mein Raub bringen mich.

Botz secht da seltzam Briefelein /

870Die gwiß für jhn her gsträwet seyn /

Ja freylich ja / pfui pfui / ich zauf /

Ich kans wol gar nit heben auff.

Jetzund hab ich schon satten bhricht /

Was drinnen bey dem Doctor gschicht.

[33]Philautia, Hypocrisis,

876Kombt her / secht zue / was ist doch diß?

Du aigne Lieb / du Gleißnerey /

Wo seyd jhr doch / kombt gschwind herbey /

Ey ey / ey ey; ey ey / ey ey /

880Was helt dich auff / O Gleißnerey /

O aigne Lieb / wo seyds so lang?

Wie wird mir nit allda so bang?

Kombt doch. Glaub sie seyn ghörloß worden /

Helt sie ein gwalt auff / ander orthen?

885Kombt eylends baid / seyds noch nit hie?

So vngehorsamb warens nie;

Vor waren sie in allen Gassen /

Jetzt will sich keine sehen lassen.

Bey tausent Teufeln / wo seyd jhr?

890Jhr beyd HöllTeuflin kombt herfür.

Hyp. Was ist doch nötigs kommen auß?

Daß wir so eylends müssen rauß?

Phil. Der Doctor ziecht mich da zu sich /

Da will ein andrer haben mich.

895Pan. Ich / hab gerueffen alle beed /

Dann mich vnd euch zugleich angeht /

Was vns befilcht der Lucifer

Das höchst Haupt / mein vnd ewer Herr,

Wo seyds so lang? Was hat euch gjrrt?

900Hyp. Wir waren sehr starck occupiert.

Pan. Diß eben ist das ich will wissen /

Hyp. Beym Doctor waren wir geflissen.

Der bsinnet sich vnd helt sich jnn /

Ist nit so ghorsamb als vorhin.

[34]Pan. Das hat nur ewer Faulkeit gmacht /

906Hyp. Ja freylich du hast vbel gwacht /

Vnd hast den Feind gelassen ein.

Pan. Mainstu villeicht den Engel sein?

Hyp. Ja disen / vnd zwar nit allein.

910Pan. Wer dann ist noch sampt jhm hinein?

Hyp. Das Gwissen. Pan. Ey Ey: Ey Ey Ey /

Was thut der Cenodox darbey?

Bewegts jhn auch? Kehrt er sich dran?

Hyp. Bißweiln fang er zuzweifflen an /

915Erschrickt / vnd geht jhm zu ein grauß /

Schlagt vnsern rath vnd mainung auß.

Pan. Gehts flux hin / es ist einmal wahr /

[42]Bey lang verziehen ist gefahr:

Braucht noch zumaln all ewren fleiß

920All listig stücklein schwartz vnd weiß:

Vnd jagt das Gwissen auß dem Hauß /

Sonst ist es gwißlich mit vns auß /

Entzwischen will ich simuliern /

Meim Obristen nichts referiern /

925Geht hin vnd kombt herwider nit /

Biß das auch kombt der Doctor mit /

Ist alls verlorn vnd auß vmb mich

Wann ich nit sein verderben sich.

[35]Der ander Act.
Die 1. Scena.

Guarinus vnd Philaretus zween Studenten.

Mariscus der Schmarotzer.

Die zween Studenten wöllen zum Doctor gehn / vnderwegen begegnet jhnen Mariscus der Schmarotzer / den fragen sie / wie jhn die Vnsinnigkeit wider verlassen.

Guar. Wer geht dort gegen vns daher?

Philar. Es ist Mariscus, einmal der /

Der Possenreisser geht herauß

Auß disem so glückselign Hauß.

5O mein Marisc so bistu dann

Der vberauß glückselig Mann?

Mar. Wie da? Philar. Das du so wol bist dran

Bey disem hochgelehrten Mann.

Mar. Bey wem? Philar. Bey Cenodoxo glert /

10Hat er weil / das er vns anhört?

Mar. Gar wol; gehn eben jetzt dahin /

Die auffgehalten haben jhn /

Mit wichtigen vnd hohen Fragen /

Vnd was sie sonst bedencken tragen.

15Guar. Mich frewt / Marisc, zu diser Stund /

Das du bist wider frisch vnd gsund.

[36]Mar. Wer ich? War ich dann kranck einmal.

Guar. Man ist ja kranck in solchem fall /

Wann man vnsinnig tobt vnd wüet?

20Mar. Wer sagts von mir? das mich Gott bhüet!

Guar. Was hast gebraucht für Artzeney?

Mar. Zu wem? Guar. Zu deiner Wüetterey.

[44]Mar. Kein Artzeney war mir nit noth /

Was denckt jhr doch? Ey Gott ey Gott!

25Guar. So bist von dir selbst widerumben

Zu deim Verstand vnd Sinnen kummen?

Mar. Hab ich sie doch verloren nie /

Guar. Du schämbst dich freylich. We wolt hie

Dir von den Jungen oder Alten

30Ein solches doch für vbel halten?

Gschicht bald daß einen beist ein Hund /

So du nur wider bist gesund.

Was laugnest lang / dieweil daruon

Waiß in der Statt schon jederman.

35Mar. Man hat ein dichte sach auffklaubt /

Guar. Dennoch sagt man daruon vnd glaubt.

Mar. Wer hat die Fabel auffgebracht?

Guar. Deß Doctors Dama hats gemacht.

Mar. Derselbig letze Galgenstrick.

40Phil. Wie? Ist Dama so voller dück?

Mar. Ja diser Stricksbueb hat von mir

Auß lauter Muethwill vnd begir

Ein solche Lug vnd Fabel dicht.

Vngrochen hab ichs lassen nicht /

45So bald ich wider auß den Banden /

Auff freyem Fueß heut bin gestanden.

[37]Den Doctor es auch sehr verdroß /

Daß vns all beed der Bueb der loß /

Betrüeglich also angeführt /

50Darumb wir jhn dann wol geschmiert.

Wo Prügel / Peutschen oder Stab /

Vnd was ich nur erwischet hab /

Das alles müst er wol empfinden /

Vil grobe Straich müst er verschlinden.

55Darumb so seyd von mir vergwißt /

[45]Kein Aberwitz in mir nit ist /

Ich ha noch all mein Witz vnd Sinn /

Vnsinnig ich nie gwesen bin.

Phil. Ja wann du Brief vnd Sigl darfür

60Fein hettest auffzulegen mir /

So möcht ichs glauben / sonsten nicht /

Dann deim Verstand noch vil gebricht.

Entzwischen wöllen wir die sach /

Zu glauben dir fein gehn gemach.

65Mar. Ich bin zufriden. Mueß jetzt gehn

Zu rüeffen Philedemonen

Zu Cenodoxo meinem Herrn /

Phil. Wir wöllen auch bey jhm einkehrn.