ДОПУЩЕНО К РАСПРОСТРАНЕНИЮ ИЗДАТЕЛЬСКИМ СОВЕТОМ РУССКОЙ ПРАВОСЛАВНОЙ ЦЕРКВИ

ИС Р16-606-0258

Молитвы утренние

Востав от сна, прежде всямкого другого дела, стань благоговейно, представляя себя пред Всевидящим Богом, и, совершая крéстное знамение, произнеси:

Во и́мя Отца́, и Сы́на, и Свята́го Ду́ха. Ами́нь.

Затем немного подожди, пока все чувства твои не придут в тишину, и мысли твои не оставят все земное, и тогда произноси следующие молитвы, без поспешности и со вниманием сердечным:

Молитва мытаря

(Евангелие от Луки, глава 18, стих 13.)

Бо́же, ми́лостив бу́ди мне грéшному. (Поклон.)

Молитва предначинательная

Моли́твами святы́х отéц на́ших, Го́споди Иису́се Христé Бо́же наш, поми́луй нас. Ами́нь.

Сла́ва Тебé, Бо́же наш, сла́ва Тебé.

Молитва Святому Духу

Царю́ Небéсный, Утéшителю, Ду́ше и́стины, И́же вездé сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия сквéрны, и спаси́, Бла́же, ду́ши на́ша.

[От Пасхи до Вознесения вместо этой молитвы читается тропарь:

Христо́с воскрéсе из мéртвых, смéртию смерть попра́в, и су́щим во гробéх живо́т дарова́в. (Трижды.)

От Вознесения до Троицы после молитвы предначинательной сразу читаем «Святы́й Бо́же…».]

Трисвятое

Святы́й Бо́же, Святы́й Крéпкий, Святы́й Безсмéртный, поми́луй нас. (Читается трижды, с крестным знамением и поясным поклоном.)

Сла́ва Отцу́ и Сы́ну и Свято́му Ду́ху, и ны́не и при́сно и во вéки веко́в. Ами́нь.

Молитва Пресвятой Троице

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ нéмощи на́ша, и́мене Твоего́ ра́ди.

Го́споди, поми́луй. (Трижды.) Сла́ва, и ны́не^[1]:

Молитва Господня

О́тче наш, И́же еси́ на Небесéх, да святи́тся и́мя Твоé, да прии́дет Ца́рствие Твоé, да бу́дет во́ля Твоя́, я́ко на Небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искушéние, но изба́ви нас от лука́ваго.

Тропари Тро́и́чные

Воста́вше от сна, припа́даем Ти, Бла́же, и а́нгельскую песнь вопиéм Ти, Си́льне: Свят, Свят, Свят еси́, Бо́же, Богоро́дицею поми́луй нас.

Сла́ва: От одра́ и сна воздви́гл мя еси́, Го́споди, ум мой просвети́ и сéрдце, и устнé мои́ отвéрзи, во éже пéти Тя, Свята́я Тро́ице: Свят, Свят, Свят еси́, Бо́же, Богоро́дицею поми́луй нас.

И ны́не: Внеза́пу Судия́ прии́дет, и коего́ждо дея́ния обнажа́тся, но стра́хом зовéм в полу́нощи: Свят, Свят, Свят еси́, Бо́же, Богоро́дицею поми́луй нас.

Го́споди, поми́луй. (12 раз.)

Молитва Пресвятой Троице

От сна воста́в, благодарю́ Тя, Свята́я Тро́ице, я́ко мно́гия ра́ди Твоея́ бла́гости и долготерпéния не прогнéвался еси́ на мя, лени́ваго и грéшнаго, нижé погуби́л мя еси́ со беззако́ньми мои́ми; но человеколю́бствовал еси́ обычно и в неча́янии лежа́щаго воздви́гл мя еси́, во éже у́треневати и славосло́вити держа́ву Твою́. И ны́не просвети́ мои́ о́чи мы́сленныя, отвéрзи моя́ уста́ поуча́тися словесéм Твои́м, и разумéти за́поведи Твоя́, и твори́ти во́лю Твою́, и пéти Тя во исповéдании сердéчнем, и воспева́ти всесвято́е и́мя Твоé, Отца́ и Сы́на и Свята́го Ду́ха, ны́не и при́сно и во вéки веко́в. Ами́нь.

Прииди́те, поклони́мся Царéви на́шему Бо́гу. (Поклон.)

Прииди́те, поклони́мся и припадéм Христу́, Царéви на́шему Бо́гу. (Поклон.)

Прииди́те, поклони́мся и припадéм Самому́ Христу́, Царéви и Бо́гу на́шему. (Поклон.)

Псалом 50

Поми́луй мя, Бо́же, по вели́цей ми́лости Твоéй, и по мно́жеству щедро́т Твои́х очи́сти беззако́ние моé. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние моé аз зна́ю, и грех мой прéдо мно́ю есть вы́ну. Тебé Еди́ному согреши́х и лука́вое пред Тобо́ю сотвори́х; я́ко да оправди́шися во словесéх Твои́х, и победи́ши, внегда́ суди́ти Ти. Се бо в беззако́ниих зача́т есмь, и во гресéх роди́ мя ма́ти моя́. Се бо и́стину возлюби́л еси; безвéстная и та́йная прему́дрости Твоея́ яви́л ми еси. Окропи́ши мя иссо́пом, и очи́щуся; омы́еши мя, и па́че снéга убелю́ся. Слу́ху моему́ да́си ра́дость и весéлие; возра́дуются ко́сти смирéнныя. Отврати́ лицé Твоé от грех мои́х и вся беззако́ния моя́ очи́сти. Сéрдце чи́сто сози́жди во мне, Бо́же, и дух прав обнови́ во утро́бе моéй. Не отвéржи менé от лица́ Твоего́ и Ду́ха Твоего́ Свята́го не отыми́ от менé. Возда́ждь ми ра́дость спасéния Твоего́ и Ду́хом Влады́чним утверди́ мя. Научу́ беззако́нныя путéм Твоим, и нечести́вии к Тебé обратя́тся. Изба́ви мя от кровéй, Бо́же, Бо́же спасéния моего́; возра́дуется язы́к мой пра́вде Твоéй. Го́споди, устнé мои отвéрзеши, и уста́ моя́ возвестя́т хвалу́ Твою. Я́ко а́ще бы восхотéл еси́ жéртвы, дал бых у́бо: всесожжéния не благоволи́ши. Жéртва Бо́гу дух сокрушéн; сéрдце сокрушéнно и смирéнно Бог не уничижи́т. Ублажи́, Го́споди, благоволéнием Твои́м Сио́на, и да сози́ждутся стéны Иерусали́мския. Тогда благоволи́ши жéртву пра́вды, возношéние и всесожега́емая; тогда́ возложа́т на олта́рь Твой тельцы́.

Символ веры

¹Вéрую во еди́наго Бо́га Отца́ Вседержи́теля, Творца́ нéбу и земли́, ви́димым же всем и неви́димым. ²И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рождéннаго прéжде всех век. Свéта от Свéта, Бо́га и́стинна от Бо́га и́стинна, рождéнна, не сотворéнна, единосу́щна Отцу́, И́мже вся бы́ша. ³Нас ра́ди человéк, и на́шего ра́ди спасéния сшéдшаго с Небéс, и воплоти́вшагося от Ду́ха Свя́та и Мари́и Дéвы, и вочеловéчшася. ⁴Распя́таго же за ны́ при Понти́йстем Пила́те, и страда́вша, и погребéнна. ⁵И воскрéсшаго в трéтий день по Писа́нием. ⁶И возшéдшаго на Небеса́, и седя́ща одесну́ю Отца́. ⁷И па́ки гряду́щаго со сла́вою суди́ти живы́м и мéртвым, Его́же Ца́рствию не бу́дет конца́. ⁸И в Ду́ха Свята́го, Го́спода Животворя́щаго, И́же от Отца́ исходя́щаго, И́же со Отцéм и Сы́ном спокланя́ема и ссла́вима, глаго́лавшаго проро́ки. ⁹Во еди́ну Святу́ю Собо́рную и Апо́стольскую Цéрковь. ¹⁰Исповéдую еди́но крещéние во оставлéние грехо́в. ¹¹Ча́ю воскресéния мéртвых, ¹²и жи́зни бу́дущаго вéка. Ами́нь.

Молитва 1-я, святого Макария Великого

Бо́же, очи́сти мя грéшнаго, я́ко николи́же сотвори́х благо́е пред Тобо́ю, но изба́ви мя от лука́ваго, и да бу́дет во мне во́ля Твоя́; да неосуждéнно отвéрзу уста́ моя́ недосто́йная и восхвалю́ и́мя Твоé свято́е, Отца́ и Сы́на и Свята́го Ду́ха, ны́не и при́сно и во вéки веко́в. Ами́нь.

Молитва 2-я, того же святого

От сна воста́в, полу́нощную песнь приношу́ Ти, Спа́се, и припа́дая вопию́ Ти: не даждь ми усну́ти во грехо́вней смéрти, но ущéдри мя, распны́йся во́лею, и лежа́щаго мя в лéности ускори́в возста́ви, и спаси́ мя в предстоя́нии и моли́тве; и по сне нощнéм возсия́й ми день безгрéшен, Христé Бо́же, и спаси́ мя.

Молитва 3-я, того же святого

К Тебé, Влады́ко Человеколю́бче, от сна воста́в прибега́ю, и на дела́ Твоя́ подвиза́юся милосéрдием Твои́м, и молю́ся Тебé: помози́ ми на вся́кое врéмя, во вся́кой вéщи, и изба́ви мя от вся́кия мирски́я злы́я вéщи и диа́вольскаго поспешéния, и спаси́ мя, и введи́ в Ца́рство Твоé вéчное. Ты бо еси́ мой Сотвори́тель и вся́кому бла́гу Промы́сленник и Пода́тель, о Тебé же все упова́ние моé, и Тебé сла́ву возсыла́ю, ны́не и при́сно и во вéки веко́в. Ами́нь.

Молитва 4-я, того же святого

Го́споди, И́же мно́гою Твоéю бла́гостию и вели́кими щедро́тами Твои́ми дал еси́ мне, рабу́ Твоему́, мимошéдшее врéмя но́щи сея́ без напа́сти прейти́ от вся́каго зла проти́вна; Ты Сам, Влады́ко, вся́ческих Тво́рче, сподо́би мя и́стинным Твои́м свéтом и просвещéнным сéрдцем твори́ти во́лю Твою́, ны́не и при́сно и во вéки веко́в. Ами́нь.

Молитва 5-я, святого Василия Великого

Го́споди Вседержи́телю, Бо́же сил и вся́кия пло́ти, в вы́шних живы́й и на смирéнныя призира́яй, сердца́ же и утро́бы испыту́яй и сокровéнная человéков я́ве предвéдый, Безнача́льный и Присносу́щный Свéте, у Него́ же несть пременéния, или́ преложéния осенéние; Сам, Безсмéртный Царю́, приими́ молéния на́ша, я́же в настоя́щее врéмя, на мно́жество Твои́х щедро́т дерза́юще, от сквéрных к Тебé устéн твори́м, и оста́ви нам прегрешéния на́ша, я́же дéлом, и сло́вом, и мы́слию, вéдением или невéдением согрешéнная на́ми; и очи́сти ны от вся́кия сквéрны пло́ти и ду́ха. И да́руй нам бо́дренным сéрдцем и трéзвенною мы́слию всю настоя́щаго жития́ нощь прейти́, ожида́ющим пришéствия свéтлаго и явлéннаго дне Единоро́днаго Твоего́ Сы́на, Го́спода и Бо́га и Спа́са на́шего Иису́са Христа́, во́ньже со сла́вою Судия́ всех прии́дет, кому́ждо отда́ти по дело́м его́; да не па́дше и облени́вшеся, но бо́дрствующе и воздви́жени в дéлание обря́щемся гото́ви, в ра́дость и Божéственный черто́г сла́вы Его́ совни́дем, идéже пра́зднующих глас непреста́нный, и неизречéнная сла́дость зря́щих Твоего́ лица́ добро́ту неизречéнную. Ты бо еси́ и́стинный Свет, просвеща́яй и освяща́яй вся́ческая, и Тя поéт вся тварь во вéки веко́в. Ами́нь.

Молитва 6-я, того же святого

Тя благослови́м, вы́шний Бо́же и Го́споди ми́лости, творя́щаго при́сно с на́ми вели́кая же и 10 Молитвослов для готовящихся к Исповеди и Причастию неизслéдованная, сла́вная же и ужа́сная, и́хже несть числа́, пода́вшаго нам сон во упокоéние нéмощи на́шея, и ослаблéние трудо́в многотру́дныя пло́ти. Благодари́м Тя, я́ко не погуби́л еси́ нас со беззако́ньми на́шими, но человеколю́бствовал еси́ обы́чно, и в неча́янии лежа́щия ны воздви́гл еси́, во éже славосло́вити держа́ву Твою́. Тéмже мо́лим безмéрную Твою́ бла́гость, просвети́ на́ша мы́сли, очеса́, и ум наш от тя́жкаго сна лéности возста́ви: отвéрзи на́ша уста́, и испо́лни я́ Твоего́ хвалéния, я́ко да возмо́жем непоколéблемо пéти же и исповéдатися Тебé, во всех и от всех сла́вимому Бо́гу, Безнача́льному Отцу́, со Единоро́дным Твои́м Сы́ном, и Всесвяты́м и Благи́м и Животворя́щим Твои́м Ду́хом, ны́не и при́сно и во вéки веко́в. Ами́нь.

Молитва 7-я, ко Пресвятой Богородице

Воспева́ю благода́ть Твою́, Влады́чице, молю́ Тя, ум мой облагодати́. Ступа́ти пра́во мя наста́ви, путю́ Христо́вых за́поведей. Бдéти к пéсни укрепи́, уны́ния сон отгоня́ющи. Свя́зана плени́цами грехопадéний, мольба́ми Твои́ми разреши́, Богоневéсто. В нощи́ мя и во дни сохраня́й, борю́щих враг избавля́ющи мя. Жизнода́теля Бо́га ро́ждшая, умерщвлéна мя страстьми́ оживи́. Я́же Свет невечéрний ро́ждшая, ду́шу мою́ ослéпшую просвети́. О ди́вная Влады́чня пала́то, дом Ду́ха Боже́ственна мене́ сотвори́. Врача́ ро́ждшая, уврачу́й души́ моея́ многолéтныя стра́сти. Волну́ющася житéйскою бу́рею, ко стези́ мя покая́ния напра́ви. Изба́ви мя огня́ вéчнующаго, и чéрвия же зла́го, и та́ртара. Да мя не яви́ши бесо́м ра́дование, и́же мно́гим грехо́м пови́нника. Но́ва сотвори́ мя, обетша́вшаго нечу́вственными, Пренепоро́чная, согрешéнии. Стра́нна му́ки вся́кия покажи́ мя, и всех Влады́ку умоли́. Небéсная ми улучи́ти весéлия со всéми святы́ми сподо́би. Пресвята́я Дéво, услы́ши глас непотрéбнаго раба́ Твоего́. Струю́ дава́й мне слеза́м, Пречи́стая, души́ моея́ сквéрну очища́ющи. Стена́ния от сéрдца приношу́ Ти непреста́нно, усéрдствуй, Влады́чице. Молéбную слу́жбу мою́ приими́, и Бо́гу благоутро́бному принеси́. Превы́шшая А́нгел, мирска́го мя превы́шша сли́тия сотвори́. Светоно́сная Сéне небéсная, духо́вную благода́ть во мне напра́ви. Ру́це воздéю и устнé к похвалéнию, осквернéны сквéрною, Всенепоро́чная. Душетлéнных мя па́костей изба́ви, Христа́ прилéжно умоля́ющи; Ему́же честь и поклонéние подоба́ет, ны́не и при́сно и во вéки веко́в. Ами́нь.

Молитва 8-я, Господу нашему Иисусу Христу

Многоми́лостиве и Всеми́лостиве Бо́же мой, Го́споди Иису́се Христé, мно́гия ра́ди любвé сшел и воплоти́лся еси́, я́ко да спасéши всех. И па́ки, Спа́се, спаси́ мя по благода́ти, молю́ Тя; а́ще бо от дел спасéши мя, несть се благода́ть и дар, но дoлг па́че. Ей, мно́гий в щедро́тах и неизречéнный в ми́лости! Вéруяй бо в Мя, рекл еси́, о Христé мой, жив бу́дет и не у́зрит смéрти во вéки. А́ще у́бо вéра, я́же в Тя, спаса́ет отча́янныя, се вéрую, спаси́ мя, я́ко Бог мой еси́ Ты и Созда́тель. Вéра же вмéсто дел да вмени́тся мне, Бо́же мой, не обря́щеши бо дел отню́д оправда́ющих мя. Но та́ вéра моя́ да довлéет вмéсто всех, та да отвеща́ет, та да оправди́т мя, та да пока́жет мя прича́стника сла́вы Твоея́ вéчныя. Да не у́бо похи́тит мя сатана́, и похва́лится, Сло́ве, éже отто́ргнути мя от Твоéя́ руки́ и огра́ды; но или́ хощу́, спаси́ мя, или́ не хощу́, Хри́сте Спа́се мой, предвари́ ско́ро, ско́ро погибо́х: Ты бо еси́ Бог мой от чрéва ма́тере моея́. Сподо́би мя, Го́споди, ны́не возлюби́ти Тя, я́коже возлюби́х иногда́ той са́мый грех, и па́ки порабо́тати Тебé без лéности то́щно, я́коже порабо́тах прéжде сатанé льсти́вому. Наипа́че же порабо́таю Тебé, Го́споду и Бо́гу моему́ Иису́су Христу́, во вся дни живота́ моего́, ны́не и при́сно и во вéки веко́в. Ами́нь.

Молитва 9-я, к Ангелу Хранителю

Святы́й А́нгеле, предстоя́й окая́нней моéй души́ и стра́стней моéй жи́зни, не оста́ви менé грéшнаго, нижé отступи́ от менé за невоздержа́ние моé. Не даждь мéста лука́вому дéмону облада́ти мно́ю, наси́льством смéртнаго сего́ телесé; укрепи́ бéдствующую и худу́ю мою́ ру́ку и наста́ви мя на путь спасéния. Ей, святы́й А́нгеле Бо́жий, храни́телю и покрови́телю окая́нныя моея́ души́ и тéла, вся мне прости́, ели́кими тя оскорби́х во вся дни живота́ моего́, и а́ще что согреши́х в прешéдшую нощь сию́, покры́й мя в настоя́щий день, и сохрани́ мя от вся́каго искушéния проти́внаго, да ни в ко́ем гресé прогнéваю Бо́га, и моли́ся за мя ко Го́споду, да утверди́т мя в стра́се Своéм, и досто́йна пока́жет мя раба́ Своея́ бла́гости. Ами́нь.

Молитва 10-я, ко Пресвятой Богородице

Пресвята́я Влады́чице моя́ Богоро́дице, святы́ми Твои́ми и всеси́льными мольба́ми отжени́ от менé, смирéннаго и окая́ннаго раба́ Твоего́, уны́ние, забвéние, неразу́мие, нерадéние, и вся сквéрная, лука́вая и ху́льная помышлéния от окая́ннаго моего́ сéрдца и от помрачéннаго ума́ моего́; и погаси́ пла́мень страстéй мои́х, я́ко нищ есмь и окая́нен. И изба́ви мя от мно́гих и лю́тых воспомина́ний и предприя́тий, и от всех действ злых свободи́ мя. Я́ко благословéнна еси́ от всех родо́в, и сла́вится пречестно́е и́мя Твоé во вéки веко́в. Ами́нь.

Молитвенное призывание святого, имя которого носишь

Моли́ Бо́га о мнé, святы́й уго́дниче Бо́жий (имя), я́ко аз усéрдно к Тебé прибега́ю, ско́рому помо́щнику и моли́твеннику о душé моéй.

Песнь Пресвятой Богородице

Богоро́дице Дéво, ра́дуйся, Благода́тная Мари́е, Госпо́дь с Тобо́ю; благословéнна Ты в жена́х и благословéн плод чрéва Твоего́, я́ко Спа́са родила́ еси́ душ на́ших.

Тропарь Кресту и молитва за Отечество

Спаси́, Го́споди, лю́ди Твоя́, и благослови́ достоя́ние Твоé, побéды на сопроти́вныя да́руя, и Твоé сохраня́я Кресто́м Твои́м жи́тельство.

Молитва о живых