Күһүн балаҕан ыйын ортото, хойуу сэппэрээк быыһыгар, убайдарын-эдьиийдэрин кытары, биһиги кэпсээммит сүрүн дьоруойа – куобахчаан күн сирин көрбүт. Ийэлээх-аҕата кыра уолларыгар "Мороох" диэн ааты иҥэрбиттэр. Кини саамай мэниктэрэ уонна истигэнэ суохтара да буоллар, Мороох – сытыы харахтардаах, чуор кулгаахтаах уонна сыыдам сырыылаах эбит. Куобахтар, ас көрдүү баралларыгар, уйаларын аанын таһыттан баттатан хааллараллара. Мороох, дьэ онуоха таһырдьа оонньуу тахсаары дьулуруйара, тахсар аанын кыайан арыйбакка, төрөппүттэрин кыыһыра көрсөр идэлээҕэ. Сотору-сотору дьонун тылын истибэккэ, буруй оҥорон, муннукка турар эбит. Улахан куобахтар олоххо үөрэтиилэрин, такайыыларын, онон-манан, кулгааҕын таһынан истэрэ.

Биир кыһыҥҥы күн, ийэтин сорудаҕынан, Мороох соҕуруу тыаҕа олорор таайыгар, чыычаахтарынан, Саҥа дьылга ыҥырыы сурук ыыппыт. Мороох таайын олус таптыыра. Кини куруук ыалдьыттыы кэллэҕинэ, кыракый куобахчааннарга анаан, күндү минньигэс ууруутун кэһии гынан аҕалара уонна мүччүргэннээх сырыыларын остуоруйалаан кэпсиирэ. Мороох күнтэн-күн кэтэһэн, олус эрэйдэммит.

Конец ознакомительного фрагмента.